Pituah Ayah
disusun oleh Yus Dt Parpatiah
Bismillahhirrahmanirahim
Rabbi shorli syahri, wayasirliamri
wahlul'uddatan minlisa ni, yaf kahuqauli.
O nak kanduang sibiran tulang
buah hati limpo bakuruang
ubek jariah palarai damam
sidingin tampa di kapalo
kamari mari malah duduak
ado rundingan nan nio ayah sampaikan
Kalo diliek dipandangi nak
dicaliak umua nan tapakai
badan ayah baransua tuo
kini bajalan 60
hari patang mantari turun
awan ibarat merah sago
malam nan tidak lamo lai
nyampang tibo seruan Allah
aja sampai capek paminto
umualah tibo di jangkauan
tabuah dibua tigo tigo
badan baganjua baliak pulang
katampek asa mulo jadi
suruik katanah nan sabingkah
badarun aie pamandian
balasie bunyi cabiak kapan
dikocoang dikabek limo
cukuik dimandi aie bungo
bararak tandu kasurau
tibo di surau dibujukan
mairiang salat ampek takbir
kini manuju kapusaro
iyo tapandam di pakuburan
tagolek di liang lahat
tanah sakapa bapakalang
mahereang madok kabilat
dibateh papan sahalai
badoro tanah panimbunan
tatagak mejan nan duo
manyalo jiluang hitam
doa dibaco pangabisan
7 langkah mayik di kubua nak
datang malaikat nan batanyo
tapi jangankan tanyo ka tajawab
usah dakwa ka tabandiang
utang ka anak nan takana
kasiah tagaing nan alun sampai
jikok basuo nan bak nantun nak
taradok pusaka kabajawek
atopun warih ka dibagi
usah diharok dari ayah
sabab baalah kok baitu
salamo dunia ditunggu
ayah diseso parasaian
bilo diarak arak untuang
tapi ka ganti ameh
bak diurang timbalan pitih nan babilang
hanyo pitaruah batinggakan
banamo pitaruah ayah
itulah tando kasiah sayang
hutang nan nyato pado anak
kini kini ayah lansaikan
dangankan malah anak kanduang
simakkan bana nyato nyato
satitiak usah lupokan
sabarih jangankan hilang
ganggam arek pacikkan taguah
siang ambiaklah ka patungkek
kok malam jadikan suluah
pidoman patang jo pagi
takalu maso dahulunyo
awa mulo insan ka lahia
bundo didalam pasawangan
sadang dilamun lamun ombak
awan badai lauik mangilo
kilek patuih hujan basabuang
kalam nan bukan alang palang
doa ka Allah ka pangantungan
indak kamano ka manggapai
*bersambung
